2024 04 02_DEIA, DdNN eta NdG_ Hauteskundeez hitz egiten jarraituko dugu...

_________ Hauteskundeez hitz egiten jarraituko dugu...

Joan den igandean Aberri Eguna ospatu genuen, eta 48 ordu eskasetan hasiko da 2024ko Eusko Legebiltzarrerako hauteskundeen kanpaina, ikuspegi interesgarria… Izan ere, alde batetik, azken hamarkadetako hauteskunderik lehiatu- eta irekienak dira, protagonista berriak baitituzte kartelaren goialdean eta, bestetik, EH Bilduren eta EAJren arteko lehia zerbitzatuta eta erretiluan dagoelako, aspalditik 'pil-pil'ean. Su txikian ba eta egoki onduta. Tira… Duela urte batzuk -politikan denbora azkar-askar joan arren mezuek bere horretan diraute- Arnaldo Otegik -orduan liderra, orain ere- “garen bezala” aurkezten zirela baieztatzen zuen hauteskunde mitin batean, ez zuela ezer onartuko “lurraldetasuna- eta autodeterminazioaren azpitik". Eguneko Menuaren azken berrikuntzak independentzia lortzeko presa eta antsietate handiegirik ez dagoela aldarrikatzen du gaur: beste lehentasun edo eskaera batzuk daude, helburu subiranistek itxaron dezakete. Otegi dixit -hamaika ikusteko jaioak gara, koadrila-, Otxandianok baietz. Adibidez, EH Bilduren hautagaiak 2030erako markatu du euskal estatus berri baten data. Oso-osorik subiranoa ala epela izango al da? Aldebakarrekoa? Itundua? Norekin? Nork daki… 

Zera, holakoa datorrenarengandik etorrita nere aldetik inongo txalorik. Urteetan zehar posibilismoa, egonkortasun instituzionalera jotzea, urratsez urrats joatea, Madrilgo hauteskundeetan parte hartzeko erabaki bera edota ETAren indarkeria terroristaren aurkako erabakitako irmotasuna, kausari traizioa egitea baino gutxixeago zirela. AEren eta haren nagusienena, jakina. Gaur-gaurkoz, moteldurik dagoen kausa bera, hain zuzen. Inportantea: joko demokratikoaren arauak zorrotz errespetatzen dituzten hauteskunde askeen testuinguruan, nere aldetik trabarik ez. Dena den, emaitzak ikusteke daude. Ze, batzuen hitzak abiadura harrigarrian mutatzen badira ere, egiteak aldaezinak diren, ez dago ezkutuko agendarik gainjartzen duenik. Adi-adi, beraz, eta pilak ondo kargatuta.

Hauteskundeez hitz egiten jarraituko dugu...

2024 03 26_DEIA, NdG, DdNN_Agirre Lehendakaria 🔴⭕🟢

 

_____ Agirre Lehendakaria

Nire memoria oker ez badago, EH Bilduk Agirre Lehendakaria hauteskunde-kanpaina batean figurante gisa sartu zuen lehen aldia 2012ko Eusko Legebiltzarrerako Hauteskundeak izan ziren. Horra hor Laura Mintegi irribarretsu bat, garaiko Lehendakaritzarako hautagaia, haren sailburuak izatera deitutakoekin batera Bilboko Carlton Hoteleko balkoian, bertan egindako Agirre Lehendakariaren Eusko Jaurlaritzaren argazki historikoa birsortuz, Agirre estiloa bere baitarako aldarrikatuz. Ze Euskadik merezi zuen lehen Eusko Jaurlaritzaren mailako Gobernu berri bat, duela gutxi ETAk jarduera terrorista bertan behera utzi zuela iragarri ondorengo sortutako une historikoa kontuan hartuta. Bada, Mintegi andrearen lidergo politikoak Carltonen egindako argazkiarena iraun zuen. Eta hemen gaude, 12 urte geroago, beste hauteskundeen atarian, hamarkadetan lehiatuenak. Eta EH Bildu berriro, bere makilatxo magikoa airean astintzen, irabazteke aukera hutsa une historikoa bihurtzeko asmoz. EAJri irabaztea, jakina. Gainerako guztia batera gertatzen da rolen banaketa izan ezik.

Logikoa da bere egungo lehendakarigaiak Agirre ez aipatzea -berarentzat ETAren indarkeriaren hamarkadak iraganeko ziklo politiko huts bat badira, noraino lehen Eusko Jaurlaritzaren garaia- baina haien patroi karismatikoa, Otegi for ever, bere heriotzaren 64. urteurrenean Agirre Lehendakaria gurtzeko aukeratzea, errekor barregarria da. Hitz batez, beti aprobetxategiak, zintzotasunik eta ohorerik gabekoak. Horrela tematzen badira ere, EAJren memoria historikoaz jabetzea, non ez dagoen printzipio edo figura trukagarririk nahierara, handiegia geratzen zaie, nabarmen. Izan ere, gaur berriro kontagailua 0ra jarriz aireratu nahi izan arren, EH Bilduren arnasa ez da Agirrerenaren oinordekoa. Aitzitik, guztiz bateraezina da Agirre Lehendakariaren politiko- eta bizi-ibilbidearekin. Humanista erradikala, demokrazia, elkarbizitza eta euskal nortasun nazionalaren bai defendatzailea, beti JELpean.

Gainerako guztia, konplexuak eta propaganda.

🔴⭕🟢

2024 03 19_DEIA, DdNN, NdG_ Harro, Herri... EUSKARA! ❤️🧡💚🩵🩷💛💜

 

______ Harro Herri… Euskara!

Barregarri geratzeko arriskuan, inork ez du zalantzan jartzen euskara Europako hizkuntza bizi zaharrena denik. Beste edozeineren antzik ez izatea anekdota bat besterik ez litzateke, ez balitz bere balio linguistikoak parekorik ez duelako. Horra hor Oñatiko Unibertsitatera iristen jarraitzen diren mundu osoko ikertzaileak, haren gramatika-arauak eta aditz-denboren zehaztasuna edo bere hiztegi-aberaztasuna aztertzera.Baina bere benetakotasun propioa eta mendeetan zehar izandako bere historioaren gorabeherak gainditu egiten ditu euskerak. Koldo Mitxelenak zioenez, euskarak gordetzen duen benetako misterioa ez da bere jatorriarena, baizik eta gaur egun arte iraunaraztea. Nola azaldu ba, euskera herri gisa dugun nortasuna eusten duen eta komunitate egiten gaituen ziurtasunetik ez bada… 

Horixe sentitzen dut euskara bere burua aldarrikatzeko kalera ateratzen den bakoitzean: euskaldunen hizkuntza da, gure aurretik izan zirenena, gure ondorengoena. Korrikaren eskutik euskararen aldeko bizi ari garenaren lekukoaz, 2.000 kilometro baino gehiago Euskal Herriko alderik alde zeharkatuz, 11 egun eta 10 gauez gelditu gabe, adin eta izaera guztietako ehunka partetzaile laguntzaz eta babesaz, nik sentitzen dut euskara, Gabriel Celayaren bertsoetan poesia bezala, etorkizunez beteriko arma bat dela. Ezin dut ukatu oraingo honetan harrotasun ziztada erantsi bat sentitu nuela Irun, nere herria, izan baita Korrika aurtengo edizioaren abiapuntua. Eta itzelezko egun batzuk bizi ahal izateagatik, lagunekin eta kolore guztietako elkartekin batera, euskararekiko nere konpromisoa berritzen eta indartzen, aurten bereziki Iparraldeko Azterketak Euskaraz kolektiboa lagunduz. Tinkotasuna- eta ahalduntzearen adibide bikaina eta, aldi berean, euskararen aldeko borroka ororen errealitate komun baten adierazgarria ere: oraindik konpondu gabeko oztopoen iraunkortasuna, guztion ahalegina eskatzen dutena, jakina, baina bereziki erakundeen inplikazio zuzen eta irmoa.

Harro Herri… Korrika! Harro Herri… Euskara!

❤️🧡💚🩵🩷💙💛💜