2022 07 12_Artikuluak_DEIA_DdNNav_NdG_25 urte pasata ere 🖤🖤🖤

 

25 urte pasata ere ____________

 Gaur Miguel Angel Blancoren hilketaren urteurrena da, 25 urte dagoeneko. Bi egun lehenago, 1997ko uztailaren 10ean, ETAk bere bahiketa aldarrikatu zuen Aznarren Gobernuari ultimatum zitala bat botaz: presoen askatasuna edo Ermuako PPren zinegotziaren bizitza. Gogoan dut oraindik sentitu nuen urradura, ezintasuna. ETAk ez zuen gizatasun hatsik txikiena ere inoiz erakutsi izan baina izugarrikeria honek, gazte baten hilketarako atzera kontua publikoki erakutsita, imajina zitekeen guztia gainditzen zuen. Terroristek mehatxua bete ez zezaten zeruari erregutu besterik ezin genuela egin pentsatzen nuen, denok genekielako Gobernuak ez zuela holako xantaia onartuko, terrorismo hutsa. Baditut nire erretinan inoiz ahaztuko ez ditudan irudiak: eskuzabaltasuna, mina, enpatia... eta oraindik sentitzen ahal dudan amorrua ere bai. Benetan garai gogorra izan zen: alde batetik, Blanco familiaren samina arintzeko asmorik txikiena izan ez zuten ezker abertzaleko arduradunak eta politikariak zeuden, egunkari batzuen azal zitalekin lagunduta, eta bestaldetik, batasun-politika bertan behera uztea batzuen giraldi alderdikoien ondorioz, 'denak ETAren aurka' leloa 'dena ETA da’ bihurtu zutenak hain zuzen, non ETA = abertzaletasuna, noski. Joko zikin hau gaur ere nabarmen ikusten dela esango ez banu hipokresiaz bekatu egongo nuke: gutako batzuek elkargune etiko bat zela uste genuena manipulazio politikorako gune eskuraezin bihurtu zen laster. Gaur egun, ezin hobeto koipeztaturiko tresna ideologiko bat izaten jarraitzen du, ETAk izandako biktimen memoria baliatuz. 25 urte pasata ere, zein etsipen izugarria...

Hau esanda, ETAren gainerako biktima guztientzat ere, nere oroitzapenik zintzoena Miguel Ángel Blancorentzat, euskal gizarte osoa zutik jarri zuena, bere askatasuna eskatzearekin batera guztiona defendatzen genuelako. Era berean gaur ere, orduan bezala, aurre egin beharko diegu ETAko terroristei beren izenez deitu gabe jarraitzen dutenei: hiltzaile. Orduko koldar berberak dira. Betikoak.                                                                                            ________________________

💔💔💔

🖤🖤🖤

Haydée Mercedes Sosa... 85 cumpleaños...

San Miguel de Tucumán, 9 de julio de 1935
Larga vida...

2022 07 05_Artikuluak_DEIA_DdNNav_NdG_Arrakastaz hiltzea ✔✔✔

 

 

Arrakastaz hiltzea ___________ 

Joan den astean Madrilen izan zen NATO Goi-bilera. Sánchez gobernuak egin izan zezakeen aurreikuspenik onenek ere, inoiz ez zuten izandako arrakasta asmatuko: primerako antolakuntza, nabarmena; eskandalurik ez, jakin dezaukogun behintzat; dokumentu estrategiko berri bat sinatuta, hamarkadetarako ‘Madrilgo Adierazpena' izenarekin ezagututa, tira, Madriletik zerura; inork irakurtzen ez dugun ‘kronika arrosa’ oso konten dago ere, espainiar ardo baten laguntzaz agian, munduko lider nagusia  Sánchezen emazteak duen 'liztor-gerritik' besoa pasatzearen argazkia munduan zehar zabaldu delako; eta, urrezko letrakin bukatzeko, Joe Bidenek egindako azken adierazpen publikoak non, Sanchezen lidergo politikoa goraipatuz, Estatu Batuetako aliatu sendo- eta ezinbestekotzat aldarrikatu egin duen. Nork esango zion holakorik Zapatero gaixoari… La vie en rose? Hala badirudi ere, inola ez. Europako tripetan bizi garen gerrarik gabe, Madrilgo Goi-bilera sinple-sinplea izango zatekeen, zalantzarik ez. Ukraniaren aurkako Rusiak hasitako gerrak den-dena aldatu du: NATO bera errautsetatik berpiztea lortu du; bat eginez jokatzeko prest daude Europako estatu guziak baina, era berean, gero eta nabarmenago Washington menpe; testuinguru honetan, adi egon: Espainiak % 10,2ko KPIa dauka, 37 urteetan indizerik handiena; azkenik, gosetea- eta egundoko beharraren ondorioz, Europara iristen ari diren migratzaileen uholdeak in crescendo joango direla datu zehatza eta eztabaidaezina da. Ba, Madrilgo goi-bileratik iritsitako errealitate horri erantzuna erdiragarria izan da: konpondu beharreko giza arazo bat ikusten beharrean, estatuen egonkortasun- eta segurtasunaren arrisku bezala hartzen da, mafien kontu bat, terrorismorako aproposako tresna. Horra hor ba, Melillako hesian sarraskiari  -30 migratzaile hilak- Sánchezek zabaldutako mezua: (sic) ondo konpondua. Eta kitto.

Madrid 2022, NATO Goi-bilera historiko bat, Sánchez Presidentea poz-pozik, arrazoiak ditu. Baita arrakastaz hiltzeko ere. Ikusiko.

                                                                       

... y lo que no necesita explicarse. Hiru minututan, Pilar Toro, itzela... Irun 2022 ❤❤❤

❤🖤❤❤❤
 

2022 06 21_DEIA_DdNNav_Artikuluak_Abderraman Bass...

_________________________________________________________  Abderraman Bass

Joan den larunbatean, Bidasoako uretatik erreskatatu zuten ginear gazte baten gorpua, Konpantzia irlatxo historikotik eta Behobiako nazioarteko zubitik artean. Abderraman Bass izenekoa zen gaztea, 25 urte bete berri zituen. Urte t’erdi batean soilik, Frantziara iristeko ahaleginean 7 migratzaile hil dira, gehienak ibaian itoak. Ziur nago, zalantzarik gabe, beste migratzaileak iritsiko direla Irunera eta, ametsatan blai, Bidasoako beste ibaiertzea hain gertu ikusterakoan salto egitea saiatzen jarraituko dutela: oinen azpian milaka kilometroekin edota imajina daitekeen baldintzarik txarrenetan itsas-zeharbide bat egin ondoren gerra- edo gosetetik ihesiz, eta bizirik jarraitzea, Europan aurki zezaketeen edozein motatako oztopoek ez diete geldiaraziko. Baina erraturik daude, Bidasoaldeko mugan gainditu beharko den azken pausua harresi zeharkaezin bihurtu dela eta: burokrazia hutsa gizatasunik ezarekin bat eginez. Nazioarteko terrorismoren kontrako ekintza modura lehen, eta gero Covid-19 delakoaren krisiaren ondorioz, Frantziako gobernuak hasi zituen mugako kontrol zorrotzak berdin mantentzen dira oraindik, izaera diskriminatzailearekin baita nazkagarria den arrasto baztertzaile- eta xenofoboarekin ere. Kontestu honetan, hasiera-hasieratik Euskadiko agintarien aldarrikapena iraitzako migratzaileentzako ibilbide eta korredore seguruak ezartzearen alde lan egitea izan bada ere, bai Frantziak -bereziki- bai Europako erakundeek bere buruei andanas deitzen diete: bistan dago ultraeskuin arrazista- eta xenofoboren aurka  kokatzen direnei dagokitenean, salbuespenik gabe, demokraziaren printzipioak eta giza-eskubideen eta duintasunaren aldeko politikak ere alde batean bazterturik uzten dituztela, laissez faire laissez passer eta kitto. Hipokritak…

Tira, azken egunetan Irunera iritsi diren afrikar migratzaileen in crescendo zenbakia ikusita, mafien laguntzaz ere, areagotu egingo da hondamena. Badirudi, bai, uda izugarri eta bihotzgabearen atarian gaudela. Ezin dugu konformatu.

 🖤🖤🖤