2023 11 21_DEIA, DdNN eta NdG_Espainiak badu bere gobernua ✔️✔️✔️

 

________ Espainiak badu dagoeneko bere gobernua

Hiru hilabete itxaroten, baina Espainiak badu dagoeneko bere gobernua. Gehiegizko ikusmin handiko egunen ondoren, gobernu berria izendatu du Sanchezek: behin kargua zin eginez gero, legealdi honetako Ministroen Kontseiluaren lehen bileraren atarian dauden 22 gizon-emakume. Gauzak diren moduan, bada Lao-Tseren esaldi bizigarri bat bertan eskularru bat bezala egokitzen dena: lehen urratsarekin hasten da bidaia luze oro. Gertatzen dana da Sanchezen gobernu honek estimuluak soberan dituela -urrean balio duen akordio batzuk sinatuta ditu eta tira, pacta sum servanda- baina gainerako guztia -ziurtasuna, egonkortasuna- falta zaio. Ikusten denaren arabera, ohiko kortesiazko 100 egunaz ahaztu dezakete, Ferrazeko sozialisten egoitzako leihoetatik kalera begiratu beharrik gabe. Hau esanda, badirudi ez dagoela ezer espainiar panoramaren gaurkotasun politiko asaldatutik harago. Baina, egia esan, bizi garen mundu zoratu hau ez da gelditzen, ez dago horretarako prest ezta gutxieneko zentzutasuna berreskura ahal izateko ere: Gazako infernuko izugarrikeria eta basakeria areagotuta, Hamasek eta Netanyahuk aitzakiatzat erabilitako israeldar bahituak, Gobernu gehienak -NBE barne- zezelka, konplize bihurturik; Ukrainako gerrak, nazioarteko arretaren bigarren mailan baztertua, hildako- eta biktimak batzen jarraitzen ditu; Milei, sistemaren aurkako ultraeskuindar bat, Argentinako Presidente berria da eta Trump, bere txanda esperoan; Afganistan- eta Irango emakumeak eta haien askatasunaren aldeko borroka; terrorismo matxistak erahildako 52 emakume Espainian, iaz baino 2 gehiago jada; Erreserban dauden militarrak, Armada gobernuaren aurka armaz altxatzera bultzatuz, estatu-kolpe, akaso?; lehen sektorea zenbaki gorritan, erosketa-poltsa gero eta garestiagoa, hipotekak ere; Europa, hartutako immigrazio-politika atzerakoien eskutik -ez asilorik, ez arretarik, ez harrerarik-, gizatasun falta-zauri irekiaren bidez odolusten; etabar, etabar.

Baina Espainiak badu dagoeneko Gobernu berria. No problem.

 ✔️✔️✔️

2023 11 14_DEIA, NdG eta DDNN_Politikari zor zaizkio ❌❌❌

__________ Politikari zor zaizkio

Azkenean, badirudi inbestidura egongo dela eta, dirudien arabera, lehenengo saialdian. Hau da, Pedro Sánchez Espainiako Gobernuko presidente izendatuko dute Diputatuen Kongresuan gehiengo osoz, 173 botoz, duela lau urte baino 12 baiezko gehiagorekin. Nork esango zuen orduan, nork uztailean hauteskunde orokorrak egin zirenean, nork ziurtatuko zukeen baldintzarik gabe duela aste pare bat baino ez… Hala ere, egongo da esango duenik hori guztia eta askoz gehiago azaldurik dagola dagoeneko Sánchezek berak idatzitako 'Manual de resistencia" liburu famatuan, non bere buruari auto-egiaztatzen dion klase politikoko ikaslerik ausarti- eta hoberetzat. Beno, lehen pertsonan adierazita ez dirudi sinesgarria denik, dotore ezta ere. Dena den, hau dela edo bestea dela, etapaz etapa oztopoak gainditzen ari da Sánchez eta seguruenik, era berean, 'gero gerokoak' bere buruari esanez. Baina, egia esan, presidente izendatu, karguaren zina egin eta datorren gobernua osatu aurretik ere, etxeko-lanak eta betebeharrak mahai gainean pilatzen ari zaio, orain inoiz ez bezala. Apustu sendoa egin du, ezin zuen bestela izan, eta Moncloara ziztu batean iritsiko prest dago. Baina behin hara iritsita, auskalo... ze, daukan legealdiko dantza-karneta izenez, ekintzaz eta konpromisoz bete-betea dagoen, garaiz erantzute- eta kudeatzeke dago dena, bai epe labur, ertain edo luzera. Hitzemandakoak inprobisaziotik ihes egitea exijitzen du, Sanchezek egindako mugimendu bakoitzak behin eta berriz errebalida osoa gainditzea eskatuko diola eta. Gainera, edozein aktoren planterik txikienari aurrean, legealdiari agur. Tira, Politika, letra larriz, izena du honek. Espero dut, bai, Feijóok & Ciak -hain harro dirudite konpartitzen ez duten proiektu politiko zilegi baten aurkako kale-mobilizazioen buru izanez- euren printzipio-, proposamen- eta ekintzen defentsa, irmotasun handiagoz ere, kaleetatik Parlamentura behin betiko lekualdatzea.

Inork ez zuen esan Politikagintza errexa izango zenik baina hari zor zaizkio. Edo ez?

❌❌❌    ❌❌❌    ❌❌❌

Lekuona' Juanito... AGUR! Egun handirarte... 🖤❤️💔

 

                                                                                                                                                📷 Lamia

_____ Gure aitaren altzoan, goian bego. Gure barruan dago, maite dutenen bihotzean bizitzea, hori bait da zerua / Sea, en el regazo del Padre, plenitud. Vive en nosotros, en el corazón de quienes lo aman. Porque eso es el cielo.                                                                  _____  Joxean Artze 

Maite zaitut, figura... Beñardo eta Ramon bila itzazu, faborez, itxaron iezaguzue... orain, hemen, zuen alde topa egiten dut zeruari hiru muxu lapurtuz...

Juanito Lekuona... AGUR!!! Egun handirarte.

Lux Aeterna.

🖤❤️💔

2023 11 07_DEIA, DdNN eta NdG_Noiz arte? ➕➕➕

__________ Noiz arte?

Elizaren barruan izandako pederastia-kasuei eta sexu-abusuei buruz Espainiako Herri Defendatzaileren Bulegoak egindako txosten sakonaren ondorioak ezagutu behar izan dira, Gotzain-Batzarra zuzenean aipatutzat jo zedin. 48 ordu ere ez ziren igaro Herri Defentzailea den Angel Gabilondo berak Diputatuen Kongresuko Presidente Andreari dokumentua eman zionetik, eta gotzainen erantzuna genuen dagoeneko. Biktimekiko barkamen erdipurdikoa baino zerbait gehiago adieraztera behartuak ziruditen, txostenaren edukia eta egindako azterketa demoskopiko zabalaren emaitza, zifra eta xehetasun ikaragarriekin, eraisgarriak baitira. Ba ez. Gotzainen erantzuna eta balorazioa ezohiko azkarrak izan ziren arren -ia ia amnistiari edota monarkiari buruz ahoskatzen direnean bezain azkar-, ohituak gaituzten isiltasun konplizea aukera hobea zatekeen. Izan ere, emandako datuak gezurra direla azpimarratuz Espainiako Apezpiku Konferentziako Presidentea den Omella Kardinalari entzutea, jasanezinezko desegokikeria baita. Baina gero Katiximaren egietara jotzea -Eliza aldi berean santua eta beti purifikazioaren beharduna da- bere burua gaitzespen juridiko eta moral guztietatik kanpo dagoela kontsideratuz -hau da, Elizan abusuak baldin badaude, bekatuaz eta bekatariez gu geu arduratzen gara eta kitto- supremazismora oso gertu dagoen portaera ezmorala da. Testuinguru horretan, biktimei barkamena behin eta berriro eskatzea, hipokrita izateaz gain, lotsagabekeria ere bada. Hala da ere sexu-abusuen gaia Elizaren arazoa ez dela gizarte osoarena baizik ondorioztatzea. Dena den, hemen, Omella Monsinoreak arrazoi puxka bat duela esango nuke nik: Eliza ofizialak, haurren aurkako abusu eta sexu-indarkeria kasuen aurrean -ehunka edo milaka izan, bat bakarrik dagoeneko onartezina da- bere erantzukizuna bizkarra ematen jarraitzen badu, arazoa ez da Elizarena, Eliza bera da arazoa. Eta hala da erlijioso askorentzat ere, beren bizitza besteen zerbitzura zintzotasunez jartzen dutenen guztirentzat, hain zuzen.

Noiz arte?

➕➕➕   ➕➕➕   ➕➕➕